20/12/19

AGASALLA EN GALEGO


Bos días!

Xa  temos unha nova edición do "Agasalla galego"  porque sempre é un bo momento para regalar cultura e nestas festas un chiquiño máis... ;)

Recomendamos algunhas das novidades de música galega para adultos como: Guadi Galego (Inmersión), Tanxugueiras (Contrapunto), A banda da loba (Fábrica de luz), M.J. Pérez (Casandra)...


- O veleiro verde: A familia María Fumaça inicia unha nova viaxe nun veleiro verde coas bodegas ateigadas de amizade, cariño e cancións para compartir de xeito inclusivo. O noso capitán Ruí vai medrando, e con el a nosa ollada do mundo e da música: integradora, variada e intercultural.
Libro- cd (música)

- A nena e o grilo mais aló:  Pódense cazar as estrelas fugaces? Aos esqueletos préstalles bailar? Ti que cres? Atrévete a descubrilo nesta nova aventur de A nena e o grilo máis aló. Desta volta, entre medos e risas, o teatro musical mergúllanos na maxia da fantasía.
Libro- cd (música)

- A casa do terror: A casa do terror ten a porta aberta para ti!. Está chea de monstros e pantasmas que te sacarán a bailar e te farán rir e desfrutar. Ten coidado porque non desexarás saír desta aventura. Un libro-cd para gañar e facer uns amigos de medo!!
Libro- cd (música)

- Bravas. O rexurdir da luz! (Libro- cd): A infame dona Trona é feliz se ti estás triste, ou tes medo, ou te anoxas... poderán as Bravas derrotala e traer o rexurdir da da luz ao mundo? A Gramola Gominola conta a ritmo rock and roll como enfrontarse ao abuso escolar, defender a lingua, protexer a natureza e visibilizar as emocións. Mulleres bravas que inspiran e dan luz ao mundo!
Libro- cd (música)

- A fraga do meu avó: A fraga do meu avó está chea de árbores, animais e vida, pero agora vese rodeada de eucaliptos e de xente que tenta cortala. Para concienciar da problemática dos bosques autóctonos e dos espazos naturais, nace este traballo, cheo de poesía, música e ilustracións para chegar ao corazón de todos e todas para que os nenos e nenas sigan gozando de espazos de vida como este. Espazos que tan ben coidaron os noso avós. 
Libro- cd (música)

- Ola! Son un bicho bóla: Ola! Son un bicho bóla! É un libro para prelector*s e primeir*s lector*s, para explorar a soas ou ler xunt*s. Un libro para rir e descubrir as habilidades dos bichos bóla que viven ao redor do mundo.
Pre- lectores (Infantil)

- Atópame no mar: Quen está detrás das algas? Coñece os animais que viven no mar deplegando solapas. Pertence a unha colección de libros baseados en escenarios naturais que descobren o mundo animal aos máis pequenos a través de preguntas, coridas ilustracións e sorprendentes solapas. 
Pre- lectores (Infantil)

O acuario : Era unha vez un acuario e os seus habitantes, todos iguais, todos distintos. Un mundo pequeno, mais con problemas, onde transcorre esta historia sinxela e ben escrita sobre diferenzas, prexuízos, axuda. Un conto ilustrado e de éxito moi coñecido entre os máis novos. 
Primeiros lectores 

- As aloucadas historias dos Monkis: Ir de vacacións, conseguir algúns libros ou tocar o piano poden chegar a se converter nun auténtico pesadelo para a familia Monki. As súas aloucadas ideas farán que Musa, a súa mellor amiga, lles faga aprender a pensar e a resolver os seus propios problemas.
Primeiros lectores 


- O can de Milú: O amor polos animais, a amizade incondicional ante as adversidades e, sobre todo, a liberdade son as cualidades sobresaíntes na obra distinguida co XII Premio Internacional Compostela de Álbum Ilustrado. «O can de Milu», de Mariann Máray, é a historia dunha nena e da súa peculiar mascota, que se converte no seu gran compañeiro de xogos e de diversión. O intenso e abundante colorido das ilustracións transpórtanos dende o bosque á cidade, pasando polo fogar, coa natureza como destino e espazo de reflexión e de liberdade. Son imaxes cheas de detalles, cercanas á estética naíf e ao mundo da infancia, que xogan de xeito audaz cos contrastes cromáticos.
Lectores autónomos

- As pitas baixo a choiva: As pitas baixo a choiva é un relato breve que narra un feito anecdótico da infancia do autor. Descobre o neno desde a fiestra da casa que as pitas estanse a mollar e el téntaas facer entrar ó galiñeiro; elas asústanse e, ao final, todos os membros da familia acaban mollados como pitos. Publicado na revista Lar en 1952, a presente edición é a primeira desta obra de Carvalho Calero en formato de libro.
Lectores autónomos



- A que cheiran as cores. A esperada guía para coñecer o cerebro: Es quen de mover cousas coa mente? A que sabe a cor azul?Pareceríanos normal escoitar estas preguntas nunha conversa entre HarryPotter e os seus colegas. Mais Juan Casto Rivadulla Fernnández nunca estivo en Hogwarts. É un neurocientífico galego que responde estas cuestións tan disparatadas mentres nos explica, dun xeito divertido e sinxelo, o funcionamento do cerebro.
Lectores expertos

- Os ecos do lume :Noa ten doce anos e parece que o único que lle importa é Internet e o que pensan dela os seus compañeiros do instituto. Pero iso vai cambiar. Durante un terrible incendio perderá o seu irmán pequeno nunha mámoa, que en realidade é o acceso ao incrible mundo Introterrestre. E isto é o principio. Irá na procura do cativo e poñerá en risco a súa vida con tal de axudalo. Descubrirá que existen eirugas coma coches e tartarugas coma montañas. Aprenderá que nese mundo de seres estraños ela é o monstro. Será consciente do dano que lle fan os humanos á Terra, e por que son odiados naquel mundo subterráneo. Enfrontarase ao Gardián da luz ancestral e resolverá o secreto misterio dos ecos do lume.
Lectores expertos

- Os nosos bosques: Libro cartoné gran formato con 5 ilustracións en acuarela nas que resaltamos 10 especies de cada un dos ecosistemas nomeados.En “Os nosos bosques” as fermosas ilustraciónsamósannos  a riqueza de vida que agochan os diversos bosques galegos, invitándonos a esculcalas  e  coñecermos as fragas atlánticas, as devesas luguesas, as carballeiras e soutos repartidos polo territorio… para descubrirmos a realidade que cubre boa parte do país.
Lectores adultos


Esperamos que disfrutedes das lecturas e das vacacións... boas festas!

29/10/19

BENVIDA: DÍA DAS BIBLIOTECAS!


Boas lectoras e lectores!

Xa estamos nun novo curso escolar e, como xa sabedes, o noso proxecto trata un tema tan fermoso e interesante como é  O MAR

Con tanta inspiración mariña a nosa Caracola Tola decidiu reformar completamente a biblioteca e, por iso de momento, non está funcionando con normalidade... tranquil@s, veredes como a espera ben merecerá a pena. 

Pese a isto, a Caracola Tola non deixa de traballar e segue propoñendo actividades que fomenten a lectura ás nenas e nenos deste colexio.

Así o pasado  24 de outubro, polo "Día das bibliotecas" a Caracola Tola púxose en contacto con cada clase enviándolles unha mensaxe nunha botella, un agasallo para cada biblioteca de aula e (como non) a tradicional mochila viaxeira... todo moi mariño! como podedes apreciar nas seguintes fotos:

Saúdos con recendo do mar da vosa Caracola!!

19/6/19

AGASALLOS E DESPEDIDA

O pasado venres tivemos a despedida da nosa Biblioteca Caracola Tola. Os axudantes de 5º e 6º de EP recibiron uns fermosos agasallos pola súa colaboración en todo o curso.



Ademais, os gañadores do último concurso de Adivi-Patio e os participantes do Recreo Musical de Buracos tamén recibiron o seu merecido recoñecemento. Unha xornada de lembranzas nas que destacamos todo un curso de aprendizaxe e bos ratos na nosa fragua de libros.

A Caracola Tola despídese  e espéravos o vindeiro curso con moitas sorpresas e algún cambio na nosa Biblio...

Que pasará?????



17/6/19

XABIER DOCAMPO

A pasada semana estivemos traballando a obra de Xabier Docampo. Para rendirlle homenaxe a este autor o fixemos de maneira conxunta os coles de Chapela. Gran autor cunha ampla obra que expusemos no noso expositor das Conmemoracións. 



A clase de 4º de EP traballando a obra de Xabier Docampo:


Adapatación musical do conto "De cores e de amores" feita na última clase de música de 2º de E.P. Música composta por Susa Herrera e adaptación da profe Ángela:




12/6/19

NOVIDADES XUÑO

Xa levan 12 días as Novidades de Xuño na nosa Biblioteca!Aínda tes uns días máis para velas!
Pásate pola Biblio de Caracola Tola!!


2/6/19

ROSAURA E O MAR

Durante o mes de maio estivemos traballando, tanto en Infantil coma nos cursos de 1º a 4º de Primaria, o libro Rosaura e o mar, da autora Isabel Blanco. Un libro sobre os oficios do mar, con historias salgadas nas que Rosaura é mariñeira, percebeira, pescadeira, redeira...Uns versos nos que nos traslada ao mundo do mar e no que aprendimos moito vocabulario e multitud de curiosidades que conta a protagonista. 

Cada clase elaborou unha caixa cunha profesión de Rosaura, e a profe Lucía fixo unha lonxa con cangrexos, mexillóns, polbos e sardiñas. Con todo,  fixemos un mural enorme no que colaborou "Jara" cos seus aparellos de mariscadora: angazo, raspín, neopreno, as medidas para coller ameixas (fina e xapónica), sacho, escarpines...  

O pasado venres tivemos a gran sorte de contar coa visita das dúas protagonistas desta historia do mar: a escritora Isabel Blanco e Jara que achegounos a súa amada profesión de mariscadora. Foron dúas sesións para 1º, 2º 3º e 4º de Primaria nas que aprendimos, entre outras cousas, con Jara: os utensilios necesarios para poder mariscar e o seu uso (cinto, sacho, raspín, cesto, angazo, tinón...), os tipos de cunchas das ameixas, as medidas para collelas, a limpeza de algas que fan as mariscadoras para que as ameixas"respiren" e crezan, as festas gastronómicas...Un traballo de auténticas guerreiras!

Isabel contounos cómo comezou a escribir para nenos, as Rosauras que hai : "Rosaura cociñeira", "Rosaura e o mar" e "Rosaura cesteira de Mondariz". Os rapaces queren máis Rosauras e teñen moitas ideas: Rosaura..científica, gandeira, a través do tempo, deportista, xardineira, escritora, aventureira....

Grazas Isabel e Jara por compartir a vosa paixón e vosas profesións! Esperámosvos na biblio da Caracola Tola. 
Bicos de sal!


Aquí está o vídeo de ROSAURA E O MAR:



23/5/19

ENQUISAS BIBLIOTECA

Xa estamos rematando o curso e queremos saber a vosa opinión sobre a nosa Biblioteca. Queremos mellorar e facer da Biblioteca Caracola Tola un lugar de unión e convivencia de toda a Comunidade Educativa.

Lembrade que o prazo remata o venres 31 de maio.
Precimos da vosa axuda completando a seguinte enquisa para as FAMILIAS:




É moi importante a opinión do alumnado,  e Caracola Tola tamén ten unha enquisa para vós. A faredes na clase cos profes.
Completade a seguinte enquisa para os ALUMN@S:





Moitas grazas a tod@s!!